ვალდებულება: სასამართლო გადაწყვეტილებების ერთიან ბაზაში გამოქვეყნება და საძიებო სისტემის შექმნა
ვალდებულების აღწერა: სასამართლო გადაწყვეტილებების პროაქტიული ხელმისაწვდომობა გამჭვირვალე სასამართლო სისტემის უმნიშვნელოვანესი კომპონენტი და წინაპირობაა. საქართველო იმ გამონაკლის ქვეყნებშია, სადაც ღია მმართველობის სამოქმედო გეგმის განხორციელებაში სასამართლო ხელისუფლებაც მონაწილეობს. საქართველოს უზენაესმა სასამართლომ ღია მმართველობა საქართველოს 2016-2017 წლების სამოქმედო გეგმის ფარგლებში საერთო სასამართლოებში გადაწყვეტილებების ხელმისაწვდომობის წესები, ძირითადი მიმართულებებისა და პრინციპების დადგენის ერთიანი სტანდარტი ჩამოაყალიბა. წესის დამტკიცების შემდგომ საერთო სასამართლოებში დაიწყო გადაწყვეტილებების გამოქვეყნების ერთიანი წესის დანერგვა და სასამართლო გადაწყვეტილებების ერთიანი რეესტრის ვებგვერდის - www.info.court.ge-ს გაუმჯობესებისთვის საჭირო სამუშაოები.

სამოქალაქო საზოგადოების რეკომენდაციით და ღია საზოგადოების ფონდის (OSGF) ინიციატივით, საქართველოს ღია მმართველობის 2018-2019 წლების გეგმა ითვალისწინებს სასამართლო გადაწყვეტილებების ერთიან ბაზაში გამოქვეყნებასა და მათი ხელმისაწვდომობის უზრუნველყოფას, რაც სასამართლო სისტემის გამჭვირვალობას, ანგარიშვალდებულებასა და ეფექტიანობის გაუმჯობესებას შეუწყობს ხელს. სამოქმედო გეგმის განხორციელების პროცესში ვალდებულება საქართველოს უზენაესი სასამართლოსგან საქართველოს იუსტიციის უმაღლესმა საბჭომ გადაიბარა. შედეგი: სასამართლო გადაწყვეტილებების ერთიანი ბაზა შექმნილია
ვადა: დაწყების თარიღი - ივლისი 2018, დასრულების თარიღი - დეკემბერი 2019
OGP მიმართულებები: გამჭვირვალობა, ანგარიშვალდებულება, ინოვაცია და ტექნოლოგიები, ჩართულობა
საანგარიშო პერიოდი: 2019, წლიური
პასუხისმგებელი უწყება: საქართველოს იუსტიციის უმაღლესი საბჭო
აღსანიშნავია, რომ საანგარიშო პერიოდში, 2019 წლის დასაწყისიდან, სასამართლო ხელისუფლების გამჭვირვალობისა და ხელმისაწვდომობის გასაუმჯობესებლად დაიწყო ახალ ვებგვერდზე მუშაობა, რათა ერთიან პლატფორმაზე თავმოყრილიყო ყველა ინსტანციის სასამართლოს გადაწყვეტილებები. 2019 წლის გაზაფხულს საქართველოს უზენაეს სასამართლოს, სსიპ - საერთო სასამართლოების დეპარტამენტსა და საქართველოს ფინანსთა სამინისტროს შორის გაფორმდა ურთიერთთანამშრომლობის მემორანდუმი, რომელიც გულისხმობდა სასამართლო გადაწყვეტილებების საერთო ბაზისა და საძიებო სისტემის შექმნას.

გამომდინარე იქედან, რომ სასამართლოების გადაწყვეტილების გამოქვეყნებისთვის შექმნილი თავდაპირველი ვებგვერდი (info.court.ge) ხარვეზებით ფუნქციონირებდა, გადაწყდა ახალი პლატფორმის შექმნა - www.ecd.court.ge, რომელიც 2019 წლის ივნისში ამოქმედდა სატესტო რეჟიმში.

სამოქმედო გეგმის შესაბამისად, საანგარიშო პერიოდში აღნიშნულ ვებგვერდზე გამოქვეყნებულია სამივე ინსტანციის სასამართლოს მიერ მიმდინარე, 2019 და 2018 წლებში მიღებული გადაწყვეტილებები და დანერგილია ერთიანი ბაზის საძიებო სისტემა. არქივის ვებგვერდზე ატვირთვისთვის განსახორციელებელი აქტივობები დაიწყება მას შემდეგ, რაც დაშტრიხვის პროცედურასთან დაკავშირებით შესაბამისი საკანონმდებლო აქტი დამტკიცდება. ვებგვერდის სრულად ამოქმედება დამოკიდებულია სხვადასხვა გარე ფაქტორზე და მიმდინარე წლის ბოლოს იგეგმება.

საქართველოს კანონმდებლობის მიხედვით, ვებგვერდზე წარმოდგენილი დოკუმენტები დაშტრიხულია პერსონალური ინფორმაციის დაცვის უზრუნველსაყოფად. მომხმარებელს საშუალება აქვს სასამართლოს გადაწყვეტილება გადმოტვირთოს და იხილოს როგორც ბეჭდურ, ისე ტექსტურ ფორმატში.

• სასამართლო აქტები (სამივე ინსტანცია)

სამივე ინსტანციის სასამართლოს აქტების მოძებნა შესაძლებელია საქმის ნომრისა და დოკუმენტზე მინიჭებული შტრიხ-კოდის (იგივე ბარ-კოდის) მეშვეობით

• საჯარო შეტყობინებები (სამივე ინსტანცია)

საჯარო შეტყობინებების მოდულის მეშვეობით შესაძლებელია სასამართლოს მიერ მხარისათვის გასაჯაროებული ყველა საჯარო შეტყობინების მოძებნა. საჯარო შეტყობინებების მოძებნა შესაძლებელია შემდეგი პარამეტრებით: ✓ საქმის ნომერი ✓ შეტყობინების გამოქვეყნების თარიღი/პერიოდი ✓ კონკრეტული სასამართლოს დასახელება ✓ საჯარო შეტყობინების ტიპი ✓ საჯარო შეტყობინებაში მონაწილე მხარის/ადრესატის დასახელება.

გარდა ზემოთ მოცემული პარამეტრებისა, სისტემაში მითითებულია შეტყობინებების პერიოდი. შესაბამისად, ეს მოდული სრულად არის ამოქმედებული.

• სასამართლო სხდომები (სამივე ინსტანცია)

ვებგვერდზე ხელმისაწვდომია საქალაქო/რეგიონული, სააპელაციო და უზენაეს სასამართლოში დაგეგმილი სხდომების შესახებ ინფორმაცია. სასამართლო სხდომების ძიება შესაძლებელია შემდეგი პარამეტრების მიხედვით:
✓ საქმის ნომერი
✓ მიმდინარე საქმის თარიღი/პერიოდი
✓ სასამართლოს დასახელება
✓ საქმის კატეგორია
✓ მოსამართლის სახელი/გვარი.

გარდა ზემოთ მოცემული პარამეტრებისა, ძიების შედეგებს თან ერთვის დამატებითი ინფორმაცია სხდომის ოთახის ნომრისა და საქმის მხარეების შესახებ. შესაბამისად, სასამართლო სხდომების მოდული სრულად ფუნქციონირებს.

• ჩემი კაბინეტი (პირველი ინსტანცია)

ვებგვერდის ერთ-ერთი მოდულია სასამართლო საქმის შემომტანის ვებსივრცე - „ჩემი კაბინეტი“, რომელიც მომხმარებელს აძლევს საშუალებას საკუთარი საქმის შესახებ სრული ინფორმაცია ერთ სივრცეში მიიღოს. შესაბამისი სასამართლო მოდულში ავტორიზაციისთვის საჭირო მომხმარებლის სახელსა და პაროლს წინასწარ გასცემს მხარეზე. სასამართლო საქმის შემომტანის ვებსივრცე ამ ეტაპზე ფუნქციონირებს პირველი ინსტანციის ფარგლებში. უწყება გეგმავს „ჩემი კაბინეტის“ მოდულის მეორე და მესამე ინსტანციის ფარგლებშიც დანერგვას.

სამდივნოს შეფასებით, ვალდებულება გეგმით გათვალისწინებულ ვადებში უმეტესწილად შესრულდა, რადგან, ვალდებულების ორი ეტაპი სრულად არ განხორციელებულა: სასამართლოს დაშტრიხული გადაწყვეტილებების და საბოლოო დოკუმენტების ძებნის საძიებო მოდული შექმნილია, თუმცა, მხოლოდ მიმდინარე, 2019 და 2018 წლების მიხედვით; ფუნქციონირებს სასამართლოში საქმის შემომტანის ვებსივრცე, თუმცა, მხოლოდ პირველი ინსტანციის ფარგლებში
საკონტაქტო პირი: ირაკლი გოცირიძე, სასამართლო გადაწყვეტილებების ერთიანი ბაზის შექმნა, gociridzeirakli@gmail.com