ვალდებულება: გამჭვირვალე და კეთილსინდისიერი მმართველობის განმტკიცება დუშეთის მუნიციპალიტეტში
ვალდებულების აღწერა: საქართველო გამოირჩევა როგორც ღია მმართველობის პროცესში ხელისუფლების სამივე შტოს ჩართულობით, ასევე, ადგილობრივი თვითმმართველობების აქტიური მონაწილეობით. ღია მმართველობა საქართველოს 2018-2019 წლის სამოქმედო გეგმის განხორციელებაში 13 მუნიციპალური ორგანო მონაწილეობს, მათგან 9 მუნიციპალურმა ორგანომ გამჭვირვალობისა და კეთილსინდისიერების ამაღლების სტრატეგიის შემუშავების ვალდებულება აიღო, რომლის დახმარებით ჩამოყალიბდება კეთილსინდისიერებისა და გამჭვირვალობის სახელმძღვანელო სტანდარტები.

საბიუჯეტო სახსრების გამჭვირვალედ და კეთილსინდისიერად გამოყენება მუნიციპალიტეტების უმთავრეს პრიორიტეტს წარმოადგენს. აღნიშნულთან დაკავშირებით, რიგი მუნიციპალიტეტებისთვის ერთ-ერთი მთავარი გამოწვევაა, რომ მათ არ გააჩნიათ სტრატეგიული დოკუმენტი, რომელიც აანალიზებს გამჭვირვალე და კეთილსინდისიერი მმართველობის პროცესში არსებულ გამოწვევებს/საფრთხეებს, ადგენს მათი გადაჭრის გზებს და განსაზღვრავს გამჭვირვალე და კეთილსინდისიერი მმართველობის არსებული სტანდარტების განმტკიცებისთვის განსახორციელებელ ქმედებებს. შესაბამისად, გამჭვირვალობის და კეთილსინდისიერების სტანდარტების დანერგვა, მნიშვნელოვნად შეუწყობს ხელს აღნიშნულ მუნიციპალიტეტებში დემოკრატიული მმართველობის ხარისხის გაუმჯობესებას. შედეგი: გამჭვირვალობის და კეთილსინდისიერების ამაღლების სტრატეგია (2019-2022); შესაბამისი სამოქმედო გეგმა (2019-2020) და მონიტორინგის ჩარჩო შემუშავებული და დამტკიცებულია მუნიციპალიტეტის საკრებულოს მიერ
ვადა: დაწყების თარიღი - ოქტომბერი 2018, დასრულების თარიღი - სექტემბერი 2019
OGP მიმართულებები: გამჭვირვალობა, ანგარიშვალდებულება, ჩართულობა
საანგარიშო პერიოდი: 2019, წლიური
პასუხისმგებელი უწყება: დუშეთის მუნიციპალიტეტის მერია
დუშეთის მუნიციპალიტეტის გამჭვირვალობისა და კეთილსინდისიერების ამაღლების სტრატეგიისა და სამოქმედო გეგმის დოკუმენტები შემუშავებულ იქნა გაეროს განვითარების პროგრამის UNDP პროექტთან  ,,დეცენტრალიზაციისა და კარგი მმართველობის ხელშეწყობა ადგილობრივ დონეზე“ მჭიდრო თანამშრომლობით. სტრატეგიისა და სამოქმედო გეგმის შემუშავების პროცესი შემდეგ ეტაპებს მოიცავდა:

• მუნიციპალური სერვისების შეფასება და სიტუაციური ანალიზის დოკუმენტის შემუშავება
• იდენტიფიცირებული სტრატეგიული პრიორიტეტების შეთანხმება და ვალიდაცია
• სტრატეგიისა და სამოქმედო გეგმის, ასევე მონიტორინგისა და შეფასების ჩარჩო დოკუმენტის სამუშაო ვერსიების მომზადება
• სტრატეგიული დოკუმენტების საჯარო განხილვები და დამტკიცება.

მუნიციპალიტეტის გამჭვირვალობისა და კეთილსინდისიერების სტრატეგია შედგება ოთხი ნაწილისაგან:

1. სტრატეგიული დოკუმენტების მიზანი, ამოცანები, პრინციპები და შემუშავების პროცესი
2. სტრატეგიის პრიორიტეტები
3. დოკუმენტების მონიტორინგის მექანიზმი
4. სტრატეგიის იმპლემენტაციის სამოქმედო გეგმა.

გამჭვირვალობისა და კეთილსინდისიერების ამაღლების სტრატეგიების მთავარი მიზანია გამჭვირვალობისა და კეთილსინდისიერების ამაღლების ერთიანი პოლიტიკის შექმნა, მუნიციპალური მმართველობის ორგანოთა გამჭვირვალობისა და ანგარიშვალდებულების გაზრდით საზოგადოებრივი ნდობის ამაღლება, სამოქალაქო საზოგადოების გაძლიერება და ჩართულობა, გამჭვირვალე და ანგარიშვალდებული მმართველობის ჩამოყალიბება.

გამჭვირვალობისა და კეთილსინდისიერების ამაღლების სტრატეგიის ამოცანებია:

• მუნიციპალიტეტის სამსახურების კეთილსინდისიერების, ღიაობის, ანგარიშვალდებულებისა და გამჭვირვალობის პრინციპების განმტკიცება
• გამჭვირვალობისა და კეთილსინდისიერების ამაღლების პროცესში სამოქალაქო სექტორის მონაწილეობის უზრუნველყოფა
• გამჭვირვალობისა და კეთილსინდისიერების ამაღლების თაობაზე საზოგადოებრივი ინფორმირებულობის გაზრდა

გამჭვირვალობისა და კეთილსინდისიერების ამაღლების მტკიცებულებებზე დაფუძნებული ეფექტური პოლიტიკის შექმნის მიზნით, მუნიციპალიტეტში ჩატარებული მუნიციპალური სერვისების შეფასების კვლევის დოკუმენტის საფუძველზე გამოვლინდა შემდეგი პრიორიტეტული მიმართულებები:

1. ადამიანური რესურსების მართვა და განვითარება
2. ადმინისტრაციულ ერთეულებში მერის წარმომადგენლების მუშაობის ხარისხის განვითარება
3. ინფრასტრუქტურა და ნებართვები
4. ჯანმრთელობა და სოციალური დაცვა