SDG მიზანი: 16 მშვიდობა, სამართლიანობა და ძლიერი ინსტიტუტები

არსებული პროგრესი:

მიმდინარეობს ნაწილობრივ შესრულდა

საანგარიშო პერიოდში კორუფციის წინააღმდეგ ბრძოლის უწყებათაშორისი საკოორდინაციო საბჭოს სამდივნოს მიერ ანტიკორუფციული საბჭოსა და ღია მმართველობა საქართველოს ფორუმის წევრ არასამთავრობო ორგანიზაციებთან თანამშრომლობით შემუშავდა კორუფციული რისკების შეფასების მეთოდოლოგია. მეთოდოლოგიის სამუშაო ვერსიის მომზადების შემდეგ დოკუმენტი წარედგინა ანტიკორუფციული საბჭოს სამუშაო ჯგუფისა და ღია მმართველობა საქართველოს ფორუმის წევრებს შენიშვნებისა და რეკომენდაციებისათვის, რომლებიც საბჭოს სამდივნომ მეთოდოლოგიის საბოლოო ვერსიაში ასახა. კორუფციული რისკების შეფასების მეთოდოლოგია წერილობითი პროცედურის საშუალებით საბჭომ 2019 წლის 30 დეკემბერს დაამტკიცა.

აღსანიშნავია, რომ ანტიკორუფციულ დანაყოფებში კორუფციული რისკების შეფასება დამოკიდებული იყო კორუფციული რისკების შეფასების მეთოდოლოგიის შემუშავებაზე, რომელიც სამოქმედო გეგმით განსაზღვრულ ვადაზე გვიან დამტკიცდა. შედეგად, საანგარიშო პერიოდში სახელმწიფო უსაფრთხოების სამსახურის ანტიკორუფციული სააგენტოსა და საქართველოს გენერალური პროკურატურის მიერ კორუფციული რისკების შეფასება ვერ განხორცილდა. აღნიშნულიდან გამომდინარე, ვერ მოხდა ახალი მეთოდოლოგიით რისკების შეფასების შედეგად იმ საჭიროებების განსაზღვრა, რაც ხელს შეუწყობდა სახელმწიფო უსაფრთხოების სამსახურის ანტიკორუფციული სააგენტოსა და მთავარი პროკურატურის კორუფციულ დანაშაულზე სისხლის სამართლებრივი დევნის სამმართველოს შემდგომ გაძლიერებას. 

რაც შეეხება, ანტიკორუფციული საბჭოს ანგარიშგების გაძლიერების მიმართულებით დაგეგმილ აქტივობას, ანტიკორუფციული საბჭოს სამდივნომ მოამზადა უწყებათაშორისი საკოორდინაციო საბჭოს შემადგენლობისა და დებულების დამტკიცების შესახებ მთავრობის 390-ე დადგენილების ცვლილების პროექტი, რომლის შესაბამისად, ანტიკორუფციულმა საბჭომ საქმიანობის ანგარიში მთავრობასთან ერთად საქართველოს პარლამენტსაც უნდა წარუდგინოს. საანგარიშო პერიოდის დასასრულისთვის, მთავრობის 390-ე დადგენილების ცვლილებების პროექტი წარდგენილია მთავრობისთვის დასამტკიცებლად და მიმდინარეობს დამატებითი კონსულტაციები.

ვალდებულების ერთ-ერთ მნიშვნელოვან კომპონენტს კორუფციული დანაშაულების გამოძიებასა და სისხლისსამართლებრივ დევნაზე მომუშავე პირების სპეციალიზაციის მიმართულებით, მათ შორის იურიდიული პირების მიერ ჩადენილი კორუფციული დანაშაულების, საერთაშორისო კორუფციული დანაშაულების გამოძიებისა და სისხლისსამართლებრივი დევნის საკითხებზე, პერიოდული გადამზადება წარმოადგენდა.

საანგარიშო პერიოდში, კორუფციული დანაშაულის გამოძიებისა და სისხლისსამართლებრივი დევნის, კორუფციის პრევენციის, ასევე კორუფციული რისკების იდენტიფიცირების, მართვის, შეფასებისა და აღმოფხვრის საკითხებზე გამართულ სასწავლო ღონისძიებებში სახელმწიფო უსაფრთხოების სამსახურის 54-მა თანამშრომელმა მიიღო მონაწილეობა.

რაც შეეხება საქართველოს გენერალური პროკურატურის თანამშრომელთა გადამზადებას, 2019  წელს კორუფციული დანაშაულის წინააღმდეგ ბრძოლის საკითხებზე განხორციელდა 6 სასწავლო აქტივობა (მათ შორის 3 სასწავლო ვიზიტი), რომლის ფარგლებშიც 36-მა თანამშრომელმა გაიარა სხვადასხვა სასწავლო კურსი. გარდა ამისა, იურიდიული პირების მიერ ჩადენილი კორუფციული დანაშაულების, საერთაშორისო კორუფციული დანაშაულების გამოძიებისა და სისხლისსამართლებრივი დევნის საკითხებთან დაკავშირებით განხორციელდა 2 სასწავლო აქტივობა, რომლის ფარგლებში გადამზადდა პროკურატურის 25 თანამშრომელი. აღნიშნულ თემებზე მოსამზადებელი კურსის ფარგლებში სწავლება გაიარა 38-მა სტაჟიორმა. გარდა ამისა, ევროკავშირის ტექნიკური დახმარების პროექტის „საჯარო მმართველობის რეფორმის მხარდაჭერა საქართველოში“, გაიმართა ტრენინგი თემაზე ,,კეთილსინდისიერება საჯარო სამსახურში“, რომლის ფარგლებშიც მონაწილეები რისკების შეფასების საუკეთესო საერთაშორისო პრაქტიკასაც გაეცნენ.

ზემოაღნიშნულ სასწავლო აქტივობებში საქართველოს გენერალური პროკურატურის წარმომადგენლებთან ერთად, სასამართლო კორპუსის, საქართველოს სახელმწიფო უსაფრთხოების სამსახურის ანტიკორუფციული სააგენტოს, საქართველოს ფინანსთა სამინისტროს საგამოძიებო სამსახურისა და საჯარო სამსახურის ბიუროს წარმომადგენლებიც მონაწილეობენ. აღსანიშნავია, რომ ერთობლივი სწავლება მნიშვნელოვნად უწყობს ხელს საერთო გამოწვევებზე ერთობლივი მიდგომების ჩამოყალიბებას.

სამდივნოს შეფასებით, ვალდებულება გეგმით გათვალისწინებულ ვადებში ნაწილობრივ შესრულდა. ანტიკორუფციული საბჭოს მიერ კორუფციული რისკების შეფასების მეთოდოლოგიის 2019 წლის 30 დეკემბერს დამტკიცებამ ხელი შეუშალა ვალდებულებით გათვალისწინებული და მეთოდოლოგიის დამტკიცებაზე დამოკიდებული ეტაპების გეგმით განსაზღვრულ ვადებში შესრულებას.